قنبلة في وسط ميونيخ!!

Photo from Süddeutsche Zeitung

كان يوم طبيعي جداً، صاحي من النوم بدري (مش بدري أوي يعني) رايح الشغل، مستني المترو و اللوحة تشير بأن المترو اللي جي قدامه 6 دقايق (آه في لوحة في كل محطة تشير بميعاد المترو اللي جي بالدقيقة)،  بس اليوم دة كان في إضافة ، خبر تحت المواعيد بيقول إن الخط التالت و السادس مش هيتوقفوا في محطه معينة، محطة في منطقة قريبة أوي من وسط البلد، السبب انهم لقوا قنبلة أثناء الحفر لموقع بناء هناك، فلازم يتم نزع فتيل القنبلة و لذلك إحتياطياً تم إلغاء المحطة.

قرأت الخبر بدون إهتمام أوي، عشان بقى شئ عادي كل كام شهر و هما بيحفروا يلاقوا قنبلة من الحرب العالمية التانية مدفونة في الأرض، ينزعوا فتيلها و الليلة تخلص في كام ساعة و ترجع الامور لطبيعتها. وصلت المكتب و طبعاً أول حاجة بعملها اني ببدأ شغل علطول (الشغل هنا معناه الاطلاع على أخبار مصر و بعدين قراءة بعض الأخبار المحلية كدا) ، اكتشفت إن الموضوع المره دي أكبر من كل مرة للاسباب الآتية:

- القنبلة المرة ديه وزنها 250 كيلو، و المنطقة اللي لقوها فيها، شبة الزمالك كدا في القاهرة من حيث الكثافة السكانية العالية، قربها من وسط  البلد و رقيها بردو.

- دة غير أصلاً انهم معرفوش ينزعوا فتيلها عشان وزنها الكبير، و النص اللي فيه الفتيل لسة مدفون في الأرض و النص التاني مكشوف منه للسما!!

طب اه الحل دلوقتي؟! قالك هنفجرها، دة بجد؟! اه بجد. تخيل كدا  قنبلة تحت برج أم كلثوم في الزمالك و محافظ القاهرة قرر يفجرها و يكون عمل حسابه إن مفيش خساير تحصل في سيلانترو اللي جنبه!!!

هيعمله حاجة اسمها التحكم في الانفجار، و دة عبارة عن تحويط القنبلة بمواد خرسانية معينة، فتمتص الانفجار و الموجات المصحوبة له حتى لا ينتقل إلى مباني المجاورة (طلع فيه حاجة اسمها كدا). بس طبعاً حاجة زي كدا من إحتياطات الآمان لازم يتم إخلاء المنطقة كلها من السكان. هما أصلاً لما اكتشفوا وجود القنبلة الليلة اللي قبلها تم اخلاء السكان من المنطقة بدائرة قطرها 300m. كل الناس سابت بيوتها ماعدا واحد صاحبي مصري ساكن هناك، هنيجي لقصته بعد شوية.

المهم لما القرار إتجه إلى تفجير القنبلة في مكانها، تم توسيع دائرة الإخلاء فأصبحت قطرها 1km. (كل دة و أصلاً المواد اللي حطوها مش حتخلي الموجات تتحرك من مكانها، بس بردو أصل هنا حياة البني آدم ليها تمن).

إحتياطات الآمان شاملة بردو غلق جميع أنابيب الغاز في المنطقة، إيقاف المترو تلت محطات قبل و بعد المحطة المشؤومة. تم الاستعانة بخبراء متفجرات من ولاية تانية من ألمانيا و تم تحديد الساعة التاسعة مساءً ميعاداً للتفجير (و الله زي ما بقول لكم كدا).

كل اللي فات دة بقى حمادة و اللي جي دة حمادة تاني خالص.

عارفين لما نبقى بنتابع ماتش كورة على يالا كورة في حاجة اسمها دقيقة بدقيقة صح؟!، أهو دة اللي حصل بالضبط، ساعة قبل ميعاد التفجير على موقع المدينة عملوا دقيقة بدقيقة للبيحصل (واخدين بالكو من الشفافية). كانت الأخبار كالآتي: وصول سيارات المطافي(عشان الانفجار هيسبب حريق لازم يطفي بسرعة)، وصول طائرات هليكوبتر لمتابعة و مراقبة سير العملية. و المفاجأة بقى انهم حطوا مواد متفجرة  من عندهم حولين القنبلة عشان يضمنوا إنها تتفجر كلها !!! ( فيه فجر أكتر من كدا)، تم تأجيل معاد التفجير لسبب ما من كتر الضحك اللي كنت فيه مش فاكره.

جت الساعة الموعودة و هوب انفجرت القنبلة، حد حس بحاجة؟! اه يعني صوت إنفجار و صوت عربيات مطافي إضافية كانت طالعة على المكان، أنا عن نفسي استغربت ازاي عربيات إضافية يعني كانوا حاسبين كل دة و مش عارفين محتاجين عربيات مطافي قد إيه؟، إيه عدم التنظيم دة (النفسنة وحشة بردو).

 طلع إيه بقى؟ لما القنبلة إنفجرت طيرت شوية ألواح خشب محروقة على سطح المبنى المجاور فلازم يتلحق بسرعة بعربيات إضافية عشان العربيات الموجودة ليها مهمة تانية (لسان حالك بقول إيه سفن إيه زيي ولا لسة!!).
الليلة ديه كلها كان اه الخساير بقى؟! ولا أي حاجة محلين جنب المكان الزجاج الأمامي بتاعهم اتكسر بس!!! و دول طبعاً التأمين هيغيرهم و خلاص على كدا. و خلصت في قد إيه؟! أقل من 24 ساعة، تاني يوم عادي جداً المواصلات شغالة عادي و الناس رجعت بيوتها  و راحت شغلها و لا كأن في قنبلة وزنها 250 كيلو انفجرت اليوم اللي قبلها!!!

نرجع بقى لقصة صاحبي المصري، هو ساكن بالضبط  جنب المنطقة اللي لقوا فيها القنبلة، بعد ما اكتشفوا وجود القنبلة تم إخلاء المنطقة بقطر 300 م  زي ما قلت، البوليس كان بيلف في الشوارع بيحذر الناس و يدعوهم لترك البيوت عبر مكبرات صوت.

صاحبنا بقى سمع الكلام دة أغلق الشبابيك و الستائر و كمل نوم عادي، نزل تاني يوم من البيت لقى طبعاً الشوارع فاضية من الناس و العربيات. و البوليس موجود في كل حتة، هو طبعاً مش فاهم فيه ايه؟ البوليس بصله باستغراب شديد و بيحاول يمنعه من المرور قائلاً: إنت بتعمل اه عندك؟

رد عليه باستغراب أشد: أنا كنت نايم في البيت!!

البوليس خلاه يعدي تقريباً رأفة بحالته و هو لسة بيبصله و هو مش قادر يستوعب، معذور أصله مايعرفش إنه مصري.

أما صاحبنا راح شغله عادي و لسان حاله بيقول: يا راجل كبر مخك!!

المصري مفيش أي إنفجار يقدر يهزه.